
रामेछाप । वडा दशै तथा शुभ दिपावलीको अवसरमा मन्थली नगरपालिका १० चनखुमा भएको भलिबल प्रतियोगिता साविक चनखु ४ नं. ले जितेको छ ।
श्री इन्द्रावती जनजागरण युवा समाजको आयोजनामा भएको ‘तेस्रो वडाअध्यक्ष कप – २०८१’ को उपाधि २-१ को सेटले लाङघाली सेवा समाजलाई पछी पर्दै साविक चनखु ४ नं. ले हात परेको छ ।
असोज २७ र २८ गते मन्थली नगरपालीका वडा नं. १० चनखु सरस्वती मा.वि को प्रांगणमा भएको थियो ।

मन्थली नगरपालीका वडा नं. १० चनखु वडा अध्यक्ष गोपीलाल तामाङको प्रमुख अतिथियतामा ‘तेश्रो वडाअध्यक्ष कप-२०८१’ उद्घाटन र समापन भएको छ ।
चनखु वडाकार्यालले आर्थिक बर्ष २०८१/०८२ को बजेटबाट खेलकुद शिर्षकमा छुट्याइएको २ लाख अनुदान रकमबाट साविक वडास्तरिय पुरुष भलिबल प्रतियोगिता गरेको इन्द्रावती जनजागरण युवा समाजका अध्यक्ष सिवाराम बुढाथोकीले बताए ।

कार्यक्रमको सहयोगी संस्थाको रूपमा ह्याङ्ला ह्युल सामुदायिक संस्था र लाङ्घाली सेवा समाज रहेको भलिबल प्रतियोगितामा साविक चनखु वडा नं ४ प्रथम, लाङ्घाली सेवा समाज द्वितीय, ह्यङला ह्युल सामुदायिक संस्था तृतीय र साविक ७ नं. ले सान्त्वना पुरस्कार जितेको आयोजकले जानकारी दिए ।

प्रथम, द्वितीय, तृतीय र सान्त्वना हुनेलाई क्रमशः नगद रु ३०,०००-,२०,०००-,१०,०००- र ५,०००- को साथमा शिल्ड,मेडल र प्रमाणपत्र दिएको आयोजकले जानकारी दिए ।
त्यस्तै कार्यक्रमा अध्यक्ष गोपीलाल तामाङले शिल्ड,मेडल र प्रमाणपत्र प्रदान गरेका थिए ।

काठमाडौं । अखिल नेपाल फुटबल संघ (एन्फा) ले महिला साफ च्याम्पियनसिपका लागि खेल्ने महिला राष्ट्रिय फुटबल टिमको घोषणा गरेको छ । एन्फाले सोमबार २३ सदस्यीय टिमको घोषणा गरेको हो ।
साफ महिला फुटबल च्याम्पियनसिप आगामी बिहिबारदेखि काठमाडौँमा हुँदै छ । यस प्रतियोगितामा नेपालसहित भारत, बंगलादेश, पाकिस्तान, श्रीलंका, माल्दिभ्स र भुटान सहभागी हुँदै छन् । नेपाल समूह बी मा श्रीलंका, माल्दिभ्स र भुटानसँग रहेको छ भने समूह ए मा भारत, बंगलादेश र पाकिस्तान रहेका छन् ।
प्रतियोगिताको पहिलो खेल बिहिबार भारत र पाकिस्तानबीच हुँदै छ । नेपालले भने शुक्रबार पहिलो खेलमा भुटानको सामना गर्दै छ ।
नेपालले यसअघिका सबै छ साफ च्याम्पियनसिपमा भाग लिए पनि अहिलेसम्म उपाधि जितेको छैन । नेपाल पाँच पटक प्रतियोगिताको उपविजेता बनेको छ । अहिलेसम्म भारतले प्रतियोगिताको पाँच पटक उपाधि जितेको छ भने एक पटक बंगलादेशले उपाधि जितेको छ ।
एन्फाले घोषणा गरेको टिम:
गोलकिपर:
अन्जिला तुम्बापो सुब्बा (सी), अञ्जना राना मगर र उषा नाथ ।
डिफेन्डर:
गीता राणा, अमृता जैसी, समिच्छा घिमिरे, निशा थोकर, पूजा राणा, विमला विक, हिरा कुमारी भुजेल र सजनी थोकर ।
मिडफिल्डर:
रेणुका नगरकोटे, प्रीति राई, सरु लिम्बु, दिपा शाही, सविता राना मगर, अनिता बस्नेत, अमिषा कार्की र विमला चौधरी ।
फरवार्ड:
रश्मीकुमारी घिसिङ, अनिता केसी, रेखा पौडेल र सावित्रा भण्डारी ।
चितवन । भाउजू हत्या गरेको अभियोगमा ज्वाइँ (नन्दको श्रीमान्) लाई प्रहरीले पक्राउ गरेको छ । माडी नगरपालिका वडा नम्बर ७ की ७१ वर्षीया विष्णुमाया रानाभाटको हत्या गरेको अभियोगमा स्थानीय ६२ वर्षीय टिकाराम रानाभाटलाई प्रहरीले पक्राउ गरी आज साँझ सार्वजनिक गरेको हो ।
रानाभाटले भाउजूको हत्या गरी भिरबाट फालेको प्रारम्भिक अनुसन्धानबाट खुलेको जिल्ला प्रहरी कार्यालय चितवनका सूचना अधिकारी भेषराज रिजालले जानकारी दिए । उनका अनुसार असोज १९ गतेदेखि घरबाट हराइरहेकी विष्णुमायाको शव असोज २१ गते घर नजिकै रहेको सामुदायिक वनको भिरमा भेटिएको थियो ।
घटना शङ्कास्पद भएपछि अनुसन्धानका क्रममा पक्राउ परेका टीकारामले प्रहरीसमक्ष हत्या गरेको स्वीकार गरेको उनले जानकारी दिए । टीकारामलाई प्रहरीले असोज २३ गते पक्राउ गरेको थियो ।
प्रहरीले घटनामा प्रयोग भएको खुर्पा एक थान, मृतकको सुनको गहना ठुलो रिङ दुई थान, सानो रिङ पाँच थान, हत्याको समयमा प्रयोग गरिएका कपडाहरू बरामद गरेको छ । रिजालका अनुसार टीकारामलाई चितवन जिल्ला अदालतबाट समय थप गरी अनुसन्धान सुरु गरिएको छ ।





