काठमाडौं, २० कात्तिक। नेपालीहरूको महान चाड तिहार आजदेखि धनतेरस मनाउँदै सुरु भएको छ। धन, स्वास्थ्य, सुख र समृद्धिको कामना गर्दै आज देशभर धनतेरस तथा धनत्रयोदशी पर्व मनाइँदैछ।

यस अवसरमा सुन, चाँदी, तामा तथा अन्य धातुका भाँडाकुँडा र गरगहना खरिद गरी घरमा ल्याउने धार्मिक परम्परा रहेको छ। साँझ घरमा दीप प्रज्वलन गरी माता लक्ष्मी, भगवान् कुबेर र धन्वन्तरीको पूजा आराधना गर्ने चलन छ।
धार्मिक विश्वासअनुसार धनतेरसका दिन नयाँ सामग्री खरिद गर्दा घरमा सुख, शान्ति र समृद्धि भित्रिने मान्यता छ। यस वर्ष तिथिको घटबढका कारण तिहार छ दिनसम्म मनाइँदैछ। शनिबार काग तिहार तथा धन्वन्तरी जयन्ती, आइतबार कुकुर पूजा र लक्ष्मी पूजा तथा कात्तिक २५ गते भाइटीका मनाइनेछ।









