
काठमाडौं । नेपाल धितोपत्र बोर्डले विभिन्न पदहरूका लागि दरखास्त आह्वान गरेको छ। शुक्रबार जारी विज्ञापनअनुसार सहायक निर्देशक (अधिकृत तृतीय) र वरिष्ठ सहायक (सहायक प्रथम) तहका पदहरू खुला तथा समावेशी प्रतियोगितात्मक परीक्षाद्वारा भर्ना गर्न आवेदन माग गरिएको हो ।
सहायक निर्देशकमा प्रशासन समूह खुला १, कानून समूह मधेशी समावेशी १ र दलित समावेशी १ पद खुला गरिएको छ। त्यस्तै, वरिष्ठ सहायकमा प्रशासन समूह खुला १ र महिला समावेशी १ पदमा आवेदन मागिएको छ ।
उम्मेदवारहरूले बोर्डको आधिकारिक वेबसाइटमार्फत अनलाइन आवेदन दिन सक्नेछन् । आवेदन असोज २ गतेभित्र दिनुपर्नेछ भने दोब्बर दस्तुर तिरेर असोज ९ गतेसम्म बुझाउन सकिनेछ ।

काठमाडौं । साताको अन्तिम कारोबार दिन शुक्रबार नेपाली बजारमा सुनको मूल्य अहिलेसम्मकै उच्च विन्दुमा पुगेको छ।
नेपाल सुनचाँदी व्यवसायी महासंघका अनुसार शुक्रबार एक तोला सुनको मूल्य २ लाख ६ सय रुपैयाँ निर्धारण गरिएको छ। यससँगै सुनको मूल्य पहिलो पटक तोलामै २ लाख नाघेको हो।
महासंघले चाँदीको मूल्य पनि तोकेको छ, जसअनुसार शुक्रबार चाँदी २ हजार ३६० रुपैयाँ मा किनबेच भइरहेको छ।
बिहीबार एक तोला सुन १ लाख ९९ हजार ४०० र चाँदी २ हजार ३५० मा कारोबार भएको थियो। आज सुनमा १२ सय रुपैयाँ र चाँदीमा ५ रुपैयाँले वृद्धि भएको छ।





